Fyrsta sjálfbærniskýrsla Háskóla Íslands komin út

Sjálfbærniskýrsla Háskóla Íslands fyrir árið 2021 er nú aðgengileg en skýrslan er fyrsta sinnar tegundar hjá íslenskum háskólum og ber Stofnun Sæmundar fróða ábyrgð á útgáfu hennar. Aukinn þrýstingur er á háskóla á alþjóðavísu að gera grein fyrir, með mælanlegum hætti, hvernig starf skólans styður við sjálfbærni og eru úttektir á þessu meðal annars notaðar við röðun háskóla á alþjóðlegum matslistum. 

Í skýrslunni er horft yfir víðfeðmt starf HÍ út frá sjálfbærni og er hún mikilvægt skref fyrir HÍ að verða leiðandi á því sviði. Sjálfbærnihugsun innan og utan HÍ er komin til að vera og eru árlegar sjálfbærniskýrslur mikilvægt verkfæri til að leggja mat á og vekja athygli á stöðu og mikilvægi sjálfbærni í öllu starfi skólans. Mikilvægt er að hafa í huga að aðferðafræðin að baki skýrslunni verður þróuð áfram í samstarfi við stjórnsýslu og fræðasvið við gerð næstu skýrslu.

Eitt af markmiðum sjálfbærniskýrslunnar var að leggja mat á umbætur og koma auga á tækifæri í sjálfbærnimálum innan HÍ. Tillögur skýrsluhöfunda að tækifærum til úrbóta eru byggðar á vinnu þeirra og tillögum sem bárust frá starfsfólki HÍ.

Skýrsluna í heild sinni og forsendur hennar má nú finna á vef Stofnunar Sæmundar fróða.